ដើម្បីប្រឡងយកបណ្ណបើកបរត្រូវការឯកសារអ្វីខ្លះ ? និងចំណាយអស់ប៉ុន្មាន ?

ចំពោះការប្រឡងយកបណ្ណបើកបរបងប្អូនអាចដាក់ពាក្យស្នើសុំប្រឡងយកបណ្ណបើកបរ និងប្តូរបណ្ណ បើកបរតាមប្រព័ន្ធ​ស្វ័យប្រវត្តិកម្មផ្តល់បណ្ណបើកបរយានយន្ត របស់ក្រសួងសាធារណការ និងដឹកជញ្ជូន ដែលមានអាសយដ្ឋាន https://driverlicense.mpwt.gov.kh ឬទៅទីតាំងផ្តល់សេវាសាធារណៈ ដែលកំណត់ ដោយក្រសួងសាធារណការ និងដឹកជញ្ជូន ដូចជា នៅផ្សារទំនើបអ៊ីអន១ ផ្សារទំនើបអ៊ីអន២ និងនៅតាមមន្ទីរសាធារណការ និងដឹក​ជញ្ជូន​រាជធានី ខេត្ត ទូទាំងប្រទេស។ ​ចំពោះ បណ្ណបើកបរប្រភេទ ក និងប្រភេទ ខ បងប្អូនអាច​ដាក់ពាក្យ​ស្នើសុំ​ប្រឡងតាមប្រព័ន្ធស្វ័យប្រវត្តិកម្ម ដោយឡែកចំពោះបណ្ណបើកបរចាប់ពីប្រភេទ គ ឡើងទៅតម្រូវឱ្យបងប្អូន​ទៅ​រៀននៅសាលាបង្រៀនបើកបរដើម្បីទទួលបានវិញ្ញាបនបត្រទទួលស្គាល់ការបើក​បរទើបមានសិទ្ធិ​ដាក់​ពាក្យស្នើសុំប្រឡងយកបណ្ណបើកបរបាន។

សម្រាប់ការប្រលងយកបណ្ណបើកបរប្រភេទ ខ បេក្ខជនទាំងពីរភេទត្រូវមានអាយុ១៨ឆ្នាំពេញ ទើបអាចដាក់ពាក្យប្រលងបាន និងតម្រូវអោយមានឯកសារមួយចំនួនដូចជា៖

• ត្រូវមានអត្តសញ្ញាណបណ្ណសញ្ជាតិខ្មែរ

• យកភ្ជាប់មកជាមួយនូវរូបថត ៤x៦ (ផ្ទៃក្រោយពណ៌ស) ចំនួន ០៣សន្លឹក

• ត្រូវមានលិខិតបញ្ជាក់កាយសម្បទា ។

ចំពោះតម្លៃសេវាសម្រាប់ការប្រលងយកបណ្ណបើកបរប្រភេទ ខ នេះ គឺមានតម្លៃ ៩០,០០០រៀល ។ តម្លៃនេះមិនរួមបញ្ចូលតម្លៃលិខិតបញ្ជាក់កាយសម្បទាទេ ។ ចំពោះតម្លៃធ្វើលិខិតបញ្ជាក់កាយសម្បទាមានតម្លៃត្រឹមតែ ១០,០០០រៀលតែប៉ុណ្ណោះ ។